La 5avla classa da la Scola chantunala grischuna da Cuira è vegnida tschernida l'onn passà da far part dal project dad Erasmus+ «Champions of Languages ​​and Minorities». La finamira da quest program europeic en il sectur da la furmaziun, da la giuventetgna e dal sport è il mantegniment da las linguas minoritaras en l'Europa.


La classa dal chantun Grischun ha ussa la pussaivladad da far part da quest project captivant ensemen cun scolaras e scolars da la Finlanda, da l'Italia, da la Pologna, da la Scozia e da la Valisa.

A l'inscunter dals giuvenils stattan en il center l'impurtanza da l'atgna lingua e cultura e la schientscha per la tradiziun linguistica. Las participantas ed ils participants vegnan sensibilisads per la tgira ed il mantegniment da lur lingua materna. Las linguas minoritaras sco il rumantsch ston sa far valair cunter cuminanzas linguisticas grondas. L'acceptanza d'ina lingua maioritara è in grond problem che n'ha betg darar per consequenza la mort da la lingua minoritara e pia era la perdita da la tradiziun e da la cultura. Cun questa chaschun survegnan las scolaras ed ils scolars la schanza da sa barattar cun glieud da la medema vegliadetgna che fan experientschas cun sumegliantas sfidas linguisticas.

La classa ha gia visità la Finlanda, la Pologna e l'Italia (Tirol dal Sid). Il project va a fin cun in viadi en Valisa la primavaira 2018. RTR ha accumpagnà la classa il december passà sin ses viadi en Finlanda e fatg in video.