L'Ovra Svizra da Lectura (OSL) porscha cudeschets bilings ch'èn ideals per l'instrucziun. Ina nova ediziun en tudestg e vallader è dacurt arrivada tar nus, gist sortida da la stampa.


L'OSL publitgescha litteratura en lingua franzosa, taliana, rumantschs ed englaisa per scolas e bibliotecas. La finamira è d'animar uffants e giuvenils da leger. In pèr da las istorgias cumparan en carnets bilings sco p.ex. l'ovretta da poesias «Tulpen/Tulipanas».

L'autura e liricra engiadinaisa Leta Semadeni, undrada cun divers premis, scriva poesias per tudestg e vallader. Las poesias en questa publicaziun n'explitgeschan betg, mabain expriman cun maletgs. Ellas din bler dapli che quai ch'è propi scrit. Perquai dovri curaschi da leger ellas, u per dir cun ils pleds da Leta Semadeni dad in da ses texts: «Fa ün sigl sainza rait sülla prosma lingia.»

Las illustraziuns en tuns cotschens e blaus da l'illustratura Madlaina Janett tschiffan il lectur ed enritgeschan la lectura cun detagls ludics or dals texts.

Ina bellezza introducziun en in dals idioms rumantschs per Vossas scolaras e Voss scolars ed ina buna preparaziun per in barat cun ina classa dal Grischun!