Il Cussegl federal vul rinforzar il barat tranter las scolas en Svizra
Il barat tranter las scolas e la mobilitad èn elements impurtants da la via da furmaziun da persunas giuvnas en Svizra. Actualmain participeschan sulettamain dus pertschient dad ellas almain ina giada durant lur temp da scola ad in project da barat. Il Cussegl federal ha l'intenziun da promover ils proxims onns talas activitads da barat e da laschar sviluppar in program per las persunas d'instrucziun. Il Cussegl federal prevesa da fixar questas finamiras en il messadi per promover la cultura ils onns 2021-2024.
En ses rapport che respunda al postulat «Concept per segiurns linguistics» da la cumissiun per scienza, educaziun e cultura (CSEC) sa referescha il Cussegl federal ultra da quai a la situaziun actuala dal barat e da la mobilitad en Svizra ed a las mesiras realisadas ils ultims onns da la Confederaziun e dals chantuns. Da quellas mesiras fan part surtut la creaziun da la Fundaziun svizra per la promoziun da barat e mobilitad (FPBM) e da sia agentura Movetia il 2016 sco era l'approvaziun da la strategia «Barat e mobilitad» l'onn 2017.
Il barat e la mobilitad contribueschan essenzialmain a la chapientscha vicendaivla da las cuminanzas linguisticas e culturalas. Grazia al barat ed a la mobilitad pon persunas giuvnas emprender d'enconuscher la multifariadad culturala da la Svizra e meglierar lur enconuschientschas linguisticas, lur cumpetenzas socialas e betg il davos lur perspectivas professiunalas.
