suchen

Il viadi dals campiuns da lingua dal Grischun va a fin


Suenter dus onns, durant ils quals la classa 6Gc da la Scola chantunala grischuna ha visità quatter scolas partenarias da differentas regiuns europeicas cun linguas minoritaras, guardan las participantas ed ils participants enavos cun plaschair sin las experientschas preziusas ch'els han pudì far. La schientscha pli ferma per l'atgna lingua e cultura è mo ina da quellas.

Ils 28 da mars ha gì lieu a Cuira l'ediziun svizra dal festival da finiziun dal partenadi da scola europeic «Champions of Languages and Minorities». A questa chaschun ha la publicitad survegnì in'invista da la lavur da project tranter scolas da la Finlanda, Valisa, Scozia, Pologna e Svizra e dal Tirol dal Sid. Sco represchentants dal rumantsch han scolaras e scolars da la Scola chantunala grischuna fatg part dal project. Movetia ha sustegnì finanzialmain il project en il rom dal program svizzer Erasmus+ ed è stà preschent al festival final. Radio e televisiun svizra e l'Associaziun tetgala svizra da magistras e magisters MCH han rapportà davart l'occurrenza.

Da bell'entschatta èn ils dus magisters svizzers Werner Carigiet e Christopher Fannin stads persvadids dal niz e dal potenzial dal project. Quai è stà il motiv per lur grond engaschament da pussibilitar ad ina classa bilingua tudestg-rumantscha quest barat unic. En la reportascha da la MCH vegnan a pled ultra da las persunas responsablas dal project era las scolaras ed ils scolars ch'èn stads da la partida. Els accentueschan ch'il barat intercultural e la lavur da project hajan pussibilità ina midada da la perspectiva, in'experientscha ch'ins «avess uschiglio pudì far, sche insumma, pir en plirs onns d'instrucziun ordinaria.»