L'agentura naziunala Movetia publitgescha ses rapport annual e la statistica per l'onn 2018. Il barat naziunal da classas e persunas singulas che Movetia promova è s'augmentà per 40 pertschient en cumparegliaziun cun l'onn precedent. Il barat cun pajais europeics è creschì en media per set pertschient. E la mobilitad internaziunala (en pajais ordaifer l'Europa) ha in success extraordinari grazia al project da pilot lantschà il 2018.


Il rapport annual 2018 da Movetia sa legia sco in sistem. Ins ha identifitgà dudesch champs d'acziun che interageschan in cun l'auter. Quels cumpiglian tranter auter las finamiras da la strategia naziunala, la cumpilaziun da statisticas, l'attribuziun da meds da promoziun ed il diever d'instruments da communicaziun. La statistica preschenta ils programs che Movetia sustegna. La cumparegliaziun è vegnida fatga cun l'onn 2017, l'emprim onn da gestiun da Movetia. Ins ha cuntanschì u schizunt surpassà per ina buna part las finamiras quantitativas.

Il barat da classas ha pussibilità a bunamain 8500 giuvenils da sa scuntrar cun scolaras e scolars d'ina autra regiun linguistica da la Svizra. Quai correspunda ad in augment da 36 pertschient cumpareglià cun l'onn precedent. Er il dumber da barats individuals è s'augmentà. L'onn 2018 han 214 giuvenils fatg part d'in barat individual, l'onn 2017 mo 144. Quai correspunda ad in augment da 48 pertschient.

Grazia als programs da Movetia han ins pudì dumbrar en l'Europa passa 23'000 mobilitads, en media set pertschient dapli che l'onn precedent. L'augment il pli impressiunant sa mussa en la furmaziun scolastica (persuna d'instrucziun) e la furmaziun professiunala (emprendistas ed emprendists). Sin il stgalim terziar hai dà in augment modest, las intschertezzas en l'ambient europeic han franà il barat e la mobilitad en quest sectur. Legraivel è persuenter l'interess enorm per il program da pilot internaziunal (ordaifer l'Europa).

In fatg positiv è en spezial l'interess e l'engaschament adina pli grond che scolas, instituziuns da furmaziun, persunas d'instrucziun e solaras e scolars mussan per barat e mobilitad. Movetia quinta cun il sustegn politic e finanzial da la Confederaziun e dals Chantuns. Quai è la premissa per in ulteriur svilup da barat emobilitad ils proxims onns e pussibilitescha da realisar la visiun da la strategia svizra, numnadamain che tut ils umans giuvens fan part almain ina giada d'in project da barat u da mobilitad. La fin finala èn il barat naziunal e la collavuraziun internaziunala uss ina part da la politica da furmaziun svizra.