Ils chantuns s'engaschan per il barat e la mobilitad dals giuvenils

L'onn da scola 2017/2018 han ils chantuns registrà 2000 mobilitads dapli che anc l'onn precedent. Per quest augment legraivel è responsabel tranter auter il dumber adina pli aut da projects cun barats da classas en Svizra. Grazia al sustegn da Movetia han bunamain 8500 scolaras e scolars gì la pussaivladad da sa scuntrar cun ina classa d'ina autra regiun linguistica. Quai correspunda ad in augment da 36 pertschient en cumparegliaziun cun l'onn precedent. Las differenzas tranter ils singuls chantuns èn dentant considerablas.

La statistica chantunala che Movetia ha publitgà resumescha las activitads da barat e mobilitad ch'èn vegnidas registradas en ils singuls chantuns l'onn da scola 2017/2018. Questa statistica resguarda era las scolaras ed ils scolars ch'èn viagiads per in project da barat u mobilitad en in'autra part dal pajais u a l'exteriur. En pli han ins registrà mo barats da classa, barats individuals e praticums da furmaziun e da manaschi ch'èn vegnids absolvids en il rom da la scola obligatorica u dal stgalim secundar II (scolaziun generala u professiunala).

Las cifras ch'ils chantuns han furnì èn in emprim pass en la direcziun d'ina statistica cumplessiva che sto vegnir sviluppada vinavant ils proxims onns. Tuttina dattan las cifras in maletg davart l'intensitad e las differentas praticas en e tranter ils chantuns. Las statisticas mussan ch'ils chantuns cun ina clera strategia, cun structuras adattadas ed investiziuns suffizientas fan ils megliers resultats. Las activitads e las structuras dals singuls chantuns vegnan preschentadas en questa ediziun.

Cun la strategia svizra per barat e mobilitad han la Confederaziun e las autoritads chantunalas formulà la finamira da meglierar pass per pass la registraziun ed il monitoring dad activitads da barat e mobilitad. Tut quai per mesirar la via a la visiun da la strategia: «En il decurs da lur scolaziun prendan tut ils giuvenils almain ina giada part d'in project da barat e mobilitad pli lung». Cun quai daventan il barat, la mobilitad e la cooperaziun ina part integrala da la politica da furmaziun svizra.