Movetia ha publitgà per l'onn 2017 sia emprima statistica davart il barat naziunal e la mobilitad europeica en il rom da la soluziun svizra per Erasmus+. L'onn passà han 6244 scolaras e scolars en Svizra prendì part ad in barat da classas. Ultra da quai han ins organisà 144 barats da vacanzas individuals. Movetia ha en pli sustegnì sin differents stgalims da furmaziun en total 6772 segiurns en l'Europa, ed i vegnan adina dapli: en cumparegliaziun cun l'onn precedent è il dumber dals projects da barat e da mobilitad creschì per tschintg pertschient.


Movetia ha publitgà per l'onn 2017 sia emprima statistica davart il barat naziunal e la mobilitad europeica en il rom da la soluziun svizra per Erasmus+. L'onn passà han 6244 scolaras e scolars en Svizra prendì part ad in barat da classas. Ultra da quai han ins organisà 144 barats da vacanzas individuals. Movetia ha en pli sustegnì sin differents stgalims da furmaziun en total 6772 segiurns en l'Europa, ed i vegnan adina dapli: en cumparegliaziun cun l'onn precedent è il dumber dals projects da barat e da mobilitad creschì per tschintg pertschient.

L'Agentura naziunala per barat e mobilitad Movetia ha publitgà per l'emprima giada ina statistica uffiziala a chaschun da ses emprim onn da gestiun cumplet. L'onn 2017 ha Movetia concedì bunamain 27,7 milliuns francs per sustegnair projects naziunals da barat, da mobilitad e da cooperaziun entaifer la Svizra ed a l'exteriur. 20 milliuns èn ids a favur da la furmaziun terziara (scolas autas) e bundant tschintg milliuns han ins concedì per la furmaziun professiunala. Per promover projects da barat naziunals èn reservads damain che dus pertschient dals meds finanzials mess a disposiziun da la Confederaziun.

Chantuns engaschads fan buns resultats
Il 2017 ha Movetia sustegnì 525 classas cun totalmain 6244 scolaras e scolars cun ina summa da CHF 432'000 ed intermedià a 144 giuvenils in partenari per in barat da vacanzas. Il dumber da segiurns da barat crescha tendenzialmain. Il barat linguistic en chantuns bilings ed en chantuns datiers dal cunfin linguistic è spezialmain frequent. Plinavant sa mussi ch'ins realisescha dapli projects en ils chantuns che dattan cleras infurmaziuns davart las pussaivladads da barat e mobilitad e che porschan a lur scolas programs da barat e mobilitad concrets. Curt e bain: in engaschi politic per il barat ed ina cultura da mobilitad vivida meglierescha cleramain las cifras en la statistica.

Actualmain participeschan ad in project da barat u mobilitad mintg'onn var dus pertschient da las scolaras e dals scolars che frequentan la scola obligatorica e la scola da furmaziun generala dal stgalim secundar II. Quest dumber ston ins però relativar, perquai che las datas transmessas dals chantuns na represchentan betg cumplettamain las iniziativas da las scolas. Ina registraziun pli sistematica e pli fidabla da las activitads da barat e mobilitad è la finala er ina da las sfidas en il rom da la nova strategia per barat e mobilitad da la Confederaziun e dals chantuns.

La mobilitad e la collavuraziun europeica avanzan
En la furmaziun professiunala han ins concedì 1007 segiurns da mobilitad en l'Europa. Quai correspunda ad in augment da 18 pertschient en cumparegliaziun cun l'onn precedent. 75 pertschient da las purtadras e dals purtaders da project èn scolas professiunalas e var 90 pertschient da las participantas e dals participants èn emprendists. Numerusas scolas professiunalas han pudì stabilir ina rait da relaziuns internaziunala grazia a projects da mobilitad per persunas d'instrucziun che han survegnì sustegn en il rom da la soluziun svizra per Erasmus+.

Sin il stgalim terziar han ins lubì 4611 mobilitads en l'Europa. Quai correspunda ad in augment da tschintg pertschient en cumparegliaziun cun l'onn 2016. Il pli grond augment han ins registrà tar ils semesters a l'exteriur classics e tar ils praticums a l'exteriur, cunzunt da studentas e students da scolas autas spezialisadas, che importan en total passa 80 pertschient dals projects da mobilitad dal stgalim terziar. Tar ils ulteriurs stgars 20 pertschient sa tracti da projects da mobilitad per il persunal da scolas autas. Las destinaziuns las pli popularas da las studentas e dals students svizzers èn la Germania, la Frantscha, la Spagna, la Gronda Britannia e la Svezia. Fitg bainvis èn projects da barat e mobilitad tar studentas e students da la scienza d'economia e da la giurisprudenza. Main legraivel è il pitschen dumber da mobilitads en la furmaziun professiunala superiura. En quel champ vul ins però cumenzar ils proxims onns cun in program da promoziun specific.

La soluziun transitorica da la Svizra per Erasmus+ offra purschidas da mobilitad en vasts secturs: en il sectur da la scola han ins approvà 70 mobilitads ed en il sectur da la furmaziun da creschids 42 mobilitads. Qua pon profitar da las mobilitads sulettamain persunas d'instrucziun e furmaturas e furmaturs da creschids. Cun process optimads ed ina meglra communicaziun vul Movetia augmentar quests dumbers ch'èn en cumparegliaziun bass. Il program «Giuventetgna en acziun» che vul promover las activitads extrascolaras ha registrà il 2017 cun passa 1000 annunzias in augment da prest set pertschient.

Ussa nov! – Las statisticas ed il rapport annual 2018 chattais Vus qua.