Il program Emprender insieme permetta a giuvenils dals stgalims secundars I e II da far in barat individual vicendaivel da duas emnas durant il temp da scola. Per scolaras e scolars da la Svizra rumantscha è in barat cun il rest da la Svizra pussaivel, quai vul dir cun scolaras e scolars da la Svizra romanda, taliana u tudestga.

2+2=4 emnas da barat – tge avantatgs ha questa furmla?

Il barat individual da duas emnas è intensiv e meglierescha las cumpetenzas linguisticas e la chapientscha da la lingua, engrondescha il stgazi da pleds e gida a sminuir retegnientschas. Il «bogn linguistic» promova ultra da quai la chapientscha per la diversitad culturala da la Svizra. Il segiurn permetta da viver e discurrer la lingua e la cultura en l'ambient da mintgadi en la famiglia ed en scola. La famiglia ospitanta viva avant la lingua e cultura dal lieu. Uschia pon tuttas duas varts profitar ina da l'autra.

Tgi po participar?

Participar pon tut las famiglias che abiteschan en Svizra. Il mument da l'emprim barat èn las partenarias u ils partenaris da barat en il stgalim secundar I u II (ca. 13 fin 18 onns) e disponan da las enconuschientschas fundamentalas da la lingua, en la quala il barat duai avair lieu. Las persunas autorisadas d'educar s'obligheschan da prender si la partenaria u il partenari da barat durant il temp cunvegnì.

Co poss jau m'annunziar?

Persunas interessadas creeschan in profil sin la plattafurma d’annunzia e s'annunzian alura per il program. I dat dus termins d'annunzia ad onn: ils 15 da matg per l'emprim semester da l'onn suandant (mo pussaivel senza midada da scola) ed ils 15 da november per il segund semester da l'onn da scola actual. Ils 30 da matg resp. da november infurmescha Movetia las persunas annunziadas, sch'ella ha chattà ina partenaria da barat adattada u in partenari da barat adattà. En cas d'ina intermediaziun reussida contacteschan las famiglias ina l'autra e fixeschan las datas dals barats. Sch'i dat dumondas, stattan Movetia sco era ils responsabels da barat en ils chantuns gugent a disposiziun.

Tge sustegn porscha Movetia?

Movetia sustegna durant tut las fasas dal barat.

  • Movetia intermediescha ina partenaria da barat adattada u in partenari da barat adattà.
  • Ella metta a disposiziuns tips e reglas per il segiurn en la famiglia ospitanta.
  • Tut las participantas e tut ils participants survegnan a la fin dal barat e suenter avair emplenì l'enquista correspundenta ina pauschala da viadi da CHF 300.-.
  • A la fin dal barat resp. suenter avair emplenì l'enquista da las participantas e dals participants emetta Movetia ina conferma da participaziun.