La Confederaziun ed ils chantuns approveschan ina strategia cuminaivla da barat e mobilitad

La Confederaziun ed ils chantuns vulan che umans giuvens participeschan pli savens ad activitads da barat e da mobilitad en il decurs da lur furmaziun ubain a chaschun da la midada en la vita da lavur. Uschia megliereschan els lur enconuschientschas linguisticas, lur cumpetenzas socialas e professiunalas e damai era lur perspectivas sin il martgà da lavur. Els emprendan en pli d'enconuscher la diversitad linguistica e culturala da la Svizra e d'auters pajais.

Sin nivel social contribueschan barats e mobilitad essenzialmain a la chapientscha vicendaivla da societads culturalas e linguisticas, els pon sustegnair la qualitad ed il svilup da la Svizra sco spazi da furmaziun, gidar a mantegnair la cumpetitivitad e l'abilitad d'innovaziun da la Svizra sco er ad integrar noss pajais en il context europeic e global. Per quests motivs sustegnan la Confederaziun ed ils chantuns il barat e la mobilitad sin tut ils stgalims da furmaziun, en il mund da lavur ed en il sectur extrascolar.

La strategia han la Confederaziun ed ils chantuns sviluppà cuminaivlamain. L'october 2017 l'han approvà ils schefs responsabels dal Departament federal da l'intern (DFI), dal Departament federal d'economia, furmaziun e retschertga (DEFR) e da la Conferenza svizra da las directuras e dals directurs chantunals da l'educaziun publica (CDEP). Ella s'adatta a las finamiras surordinadas da la politica da furmaziun, da cultura e da giuventetgna da la Confederaziun e dals chantuns.

La strategia vul ch'ins renconuschia e promovia pli fitg il barat e la mobilitad ed ella ha la finamira da cuntanscher pli autas cifras da participaziun. Ins vul amplifitgar las purschidas existentas, las sviluppar vinavant e garantir in access facil ad infurmaziuns e purschidas. La finala procura la strategia per las premissas che permettan a la Confederaziun, als chantuns ed ad auters acturs da cooperar e coordinar effectivamain ils barats e la mobilitad.

La strategia per barat e mobilitad è concepida a lunga vista. La Confederaziun ed ils chantuns s'engaschan per realisar ella pass per pass. Sin plaun operativ è la responsabladad per gronda part en ils mauns da l'agentura Movetia che la Confederaziun ed ils chantuns han fundà per promover barat e mobilitad.

«En il decurs da lur scolaziun prendan tut ils giuvenils almain ina giada part d'in project da barat e da mobilitad pli lung. Ils barats e la mobilitad èn ina part integrala da la politica da furmaziun.» Inspirada da questa visiun ha la strategia communabla da la Confederaziun e dals Chantuns la finamira dad etablir barat e mobilitad en il sistem da scola e d'als includer en ils programs da studi ed en ils plans d'instrucziun.